Num ni grau hpaji madang tsaw wa nga sai American mungdan

AMERICAN mungdan hta shayi num ni a hpaji chye chyang wa ai madang gaw, shadang la ni a madang hta grau law wa nga sai lam hpe ‘the US Census Bureay’ a jahpan hta mu lu nga ai. Master janmau, PhD janmau hte kaga kanbau bungli lam hpaji janmau ni hpe gup da lu sai hkawn-ram ni a jahpan gaw, tsalam shadang (9) rai nga ai rai tim, brang-ram ni a jahpan chyawm gaw tsalam shadang (6) sha naw rai nga ai lam hpe, dai Census Bureay gaw madi madun nga ai. Lam mi hku nna tsun ga nga yang, hpungjat hpaji janmau ni hpe gup da lu sai masha marai (10) hta na marai (6) grupyin ngu na gaw, shayi num ni re, ngu ai lachyam rai nga ai.

Maga mi de, numbat langai janmau (shing nrai B.A/B.Sc janmau) ni hpe gup da lu sai, asak (25) ning hte (29) ning lapran na shayi num ni hte shadang la ni a jahpan hta mung, num ni a jahpan gaw tsalam shadang (35) rai nga ai rai nna, la ni a jahpan chyawm gaw tsalam shadang (27) sha naw rai nga ai lam hpe mu ai. Ndai zawn, American la ni hta American num ni a hpaji madang grau tsaw wa nga ai lam gaw, ahkyak madung kanbau bungli lam ni rai nga ai hkamja lam, tara upadi lam hte kaga hpaji ningli lam ni hpe, lani mi na nhtoi hta num ni mahtang she ka-up madu da ai baw lam ni, byin wa shangun chye ai lam rai nga ai.

American mungdan de du sa wa ai kaga amyu bawsang ni a lapran hta chyawm gaw, Asha dan de na htawt du sa wa ai myusha ni hpaji grau lu shakut la nga ai lam hpe, dan dan leng leng mu lu nga ai. Jahpan hku nga yang, numbat langai janmau hpe gup da lu sai Asha rusai masha ni gaw tsalam shadang (53) rai nga ai rai nna, Spanish rusai n-re ai kaga shanhpraw masha ni a jahpan gaw tsalam shadang (33), shanchyang rusai masha ni gaw tsalam shadang (19) hte Spanish rusai masha ni gaw tsalam shadang (13) rai nga ma ai rai.-- AFP

Masha law malawng Australia hte Japan de sa du chyai mayu

Australia, Japan hte Miwa (China) mungdan ni gaw, Asia-Pacific ginra hta bu hkawm chyai na matu, masha law malawng ra sharawng dik htum ai bandung mungdan ni rai nga ai lam hpe, the Asia-Pacific Travel Survey 2010 hpe lakap nna chye lu ai. Australia mungdan gaw tsalam shadang (17) hte yawng a n-dung shara hta rai nga ai rai nna, du wa na lahkawng ning laman hta masha law malawng sa du chyai da mayu ai bandung ginra nan mung rai nga ai.

Japan mungdan gaw tsalam shadang (16) hte numbat lahkawng shara hta rai nga ai zawn, Miwa mungdan mung tsalam shadang (9) hte numbat masum shara hta rai nga ai lam hpe mung, matut nna chye lu ai. "Australia mungdan hta shingra tara hte hkrak rai nna tsawm htap la ai ginra ni nga ai zawn, Japan mungdan hta bai rai yang mung, hpu reng htum ai labau hte htunghking lailen ni nga nga ai lam ni a majaw, masha marai manga hta na marai langai mi dai mungdan ni de du chyai hkawm mayu ai lam gaw, hpa mau na shara nnga ai" nga nna Asia-Pacific hte seng ai VISA company a ginra lithkam Roy Jackson matut tsun lai wa sai rai.--AFP

Ninghkap hpung a kaba htum salang wa hkring sa mat

YANGON - Democracy hpe ra sharawng ai, mying dan dawng hkra re ai, ninghkap hpung langai a ningbaw wa gaw Laban hpang mali ya shani bungli kaw nna hkring sa mat sai lam, chye lu ai. Ndai zawn, hkring sa mat ai lam gaw, aten galu galang jawm ala dingda nga ai dai ning na ra lata poi ndai gaw, hpyen uphkang du ni ga sadi jaw da ai zawn, wanglu wanglang rai nna rap rap ra ra re ai (free and fair) ra lata poi byin tai wa na lam nnga ai, ngu ai lam a majaw rai nga ai.

Phyo Min Thein mying ai Munghpawm Democracy Hpung (Union Democracy Party) a tingnyang up wa Reuters hpe tsun ai lam hta, ra lata poi tara ni gaw ladu shalai nan ja la ai hta sha n-ga, hpyen uphkang hpung ni gaw shanhte ra sharawng madi shadaw ai uhpung uhpawng ni nan awng padang lam lu na matu, ka jahtuk da ai tara ni nan mung rai nga ai re majaw, hpyen mung up magam wa a daru magam ahkang aya hpe kahtap nna aten sharen/shana tawn ya ai lam sha re, nga ai.

“Ngai myit mada lai wa ai lam gaw, Myen mungdan masha ni yawng mungmasa lam hta shang lawm lu na lam hte hpawn, mungmasa hte seng nna sharen da hkrum ai ni hpe mung shalawt dat ya nna ra lata poi hta shang lawm lu na ahkang mung jaw na, wanglu wanglang re ai hku myit sharawt hkawm lu na lam hte wanglu wanglang re ai shilaika lam ni re. Rai tim, kaja wa tatut hta gaw, ndai lam ni langai mi mung byin pru wa ai lam nnga ai majaw, pru hkring sa mat na matu ngai dawdan kau ai lam re” nga ai.

Asak 41 ning re ai Phyo Min Thein hpe mung masha ni law malawng gaw, Myen mungdan a democracy hkrun lam a matu myit mada shara kaba tawn da mai ai wa langai re ai hku nna mu mada ai lam rai nga ai. Moi de gaw asuya hpe ninghkap ai jawngma myit sharawt langai mi tai lai wa ai lam a marang e, htawng hta 4 ning sharen da ai hkrum lai wa ai wa mung rai nga ai zawn, shi a atsam ningja ni a majaw mying gumhkawng wa ai wa mung rai nga ai.

Myen asuya gaw dai ning na shi a ra lata poi nhtoi hte seng nna dai ni ten du hkra tara shang ndau shana ai lam rai nnga shi ai rai tim, dai ning na ra lata poi ndai gaw wanglu wanglang rai nna rap rap ra ra re ai - yawng shang lawm mai ai - ra lata poi re, nga nna atsun nga ai lam rai nga ai.--The Straits Times

Hkalup sara Yawhan a n-rut n-ra a’ngaw a’ngam ni hpe mu

Hkalup sara Yawhan a n-rut n-ra a’ngaw a’ngam ni rai na re, ngu shadu ai n-ra ahkyep alep ni hpe Sveti Ivan Island mying ai, Bulgaria mungdan a dingda maga de na, zunlawng hta - lai wa sai shata htum wa maga de – mu htu shaw la lu ai lam hpe chye lu ai.

Labau htu sagawn hpaji ninghkring rai nga ai Professor Kazimir Popkonstantinov tsun sanglang dan ai lam hta “a-wa, shakap dawchyen hte lata lahpum dawchyen ni hpe mu lu ai lam re” nga ai.

Hkristan makam labau hta grai ahkyak lai wa ai wa langai mi rai nga ai hkalup sara Yawhan gaw, Madu Yesu mungkan ga de yu sa wa na lam hpe tau hkrau nna htawn shana ya ai wa mung rai nna, madu Yesu hpe hkalup jaw ai wa nan mung rai nga ai hta, hpang jahtum e gaw Herod hkawhkam wa e baw daw nna sat kau ai hkrum ai wa mung rai nga ai.

Lai wa sai (5) ning daram hta mung hkalup sara Yawhan a hkum hkrang n-rut n-ra ni hpe Iran mungdan kaw mu htu shaw lai wa sai nga nna tsun kajai lai wa sai lam rai nga ai. Rai tim, Bulgarian labau htu sagawn hpaji ninghkring ni hku nna gaw, ya mu lu ai n-rut n-ra dawchyen kaji kajaw ndai ni gaw hkalup sara Yawhan hte seng ai n-rut n-ra ni nan rai na re, nga nna kam nga ma ai zawn, kata lam hpe matut nna jep sagawn madi shadaw sa mat wa na re lam hpe mung, BBC a shiga htawn ai wa Malcolm Brabant hpe lakap nna chye lu ai.--BBC

Myen mung gaw October, shing n-rai, November shata hta ra lata poi galaw na

Myen mungdan asuya gaw, mungdan a ra lata poi hpe October jahtum na bat, shing n-rai November praw na bat, hta galaw sa wa na hku hkyen lajang nga ai lam, lahta tsang salang langai AFP hpe tsun ai lam hta lakap nna chye lu ai.

Dai ra lata poi hta shang shingjawng lawm na salang (candidate) ni hpe mung, tinang a mungmasa hpung ni hpe tara shang masat jahpan bang ngut ai hpang, shata (6) daram gaw ‘campaign’ galaw hkawm na matu aten lu na re ai lam hpe mung chye lu ai.

Hpyen asuya hku nna gaw, ra lata poi galaw na n-htoi hpe tara shang n-dau shana ai lam rai n-galaw shi ai rai tim, ndai ra lata poi hta, Daw Aung San Suu Kyi hte hpawn, mungmasa lam hte seng nna htawng hkrat yu sai kaga myitsu salang ni kadai mung, shang shingjawng lawm n-mai na matu, ndai shata praw daw hta ndau shabra dat ai ra lata poi ritkawp (election laws) ni hta a-dan sha mu lu nga ai.

National League for Democracy (NLD) hku nna gaw “ra lata poi ndai hta shang shingjawng lawm na/n-lawm na” ngu ai lam hpe dawdan masat ai lam n-galaw shi nga ai rai tim, lama wa na, shang shingjawng lawm na matu dawdan wa ai rai yang pyi gaw, numbat langai hku nna NLD galaw ra na lam gaw, Daw Aung San Suu Kyi hpe shawng uhpung kaw nna shapraw kau ra na lam rai nga ai lam hpe mung, uhpung uhpawng nnan masat jahpan bang ritkawp (new party registration laws) ni hta tsun da nga ai rai.--The Straits Times

Mungkan hta sut su dik htum ai masha marai (10)

Forbes Magazine hpe lakap nna tsun ga nga yang, mungkan ntsa hta sut su dik htum ai sutdu marai shi (10 richest people in the world) gaw, lawu de na hte maren rai nga ai.

1. Carlos Slim Helu Mexico
US$53.5 billion sut su ai, asak (70) ning re ai, sahte kummi wa (tycoon) ndai gaw, dai ning na jahpan hta numbat (1) sut su dik htum ai wa rai nga ai. Shi gaw Latin America hta kaba dik htum ai “mobile phone company” hpe madu da ai wa mung rai nga ai zawn, lai wa sai shaning na jahpan hta numbat (3) shara hpe madu da ai wa mung rai nga ai.

2. Bill Gates United States
US$53 billion sut su ai, asak (54) ning re ai, “software” ninghkring mung rai, masha hpe tsaw ra matsan dum chye ai wa (philanthropist) mung rai, re ai Bill Gates gaw, Carlos Slim a jan jan rai nna sut su rawt jat wa ai lam a majaw, dai ning na jahpan hta numbat (2) shara de du mat ai lam rai nga ai. Nampan htu tsi (vaccine) hte seng nna sawk sagawn ai lam, matsan mayan re ai mungdan ni hta nga ai shinggyim nau na ni tsi ndai hpe jai lang akyu jashawn la lu hkra sa ya ya re ai lam, ni hta ahkyak madung arang bang nna shamu shamawt nga ai lam hpe, “Bill & Melinda Gates Foundation” hpe lakap nna chye lu ai.

3. Warren Buffett United States
US$47 billion sut su ai, asak (79) ning re ai, American mungdan masha sutdu ndai gaw, dai ni na mungkan hta numbat (3) ngu na sut su dik htum ai wa rai nga ai.

4. Mukesh Ambani India
US$29 billion sut su ai, asak (52) ning re ai, Kala mung na sutdu ndai gaw, dai ning na jahpan hta numbat (4) ngu na sut su dik htum ai wa rai nga ai.

5. Lakshmi Mittal India
US$28.7 billion sut su ai, asak (59) ning re ai, Kala mung na hpri gang (steel) lauban wa gaw, ya yang e mungkan hta numbat (5) ngu na sut su dik ai wa rai nga ai.

6. Larry Ellison United States
US$28 billion sut su ai, asak (65) ning re ai, American mungdan masha sutdu ndai gaw, ya yang e mungkan hta numbat (6) sut su dik htum ai wa rai nga ai.

7. Bernard Arnault France
US$27.5 billion sut su ai, asak (61) ning re ai, French sutdu ndai gaw, mungkan hta numbat (7) ngu na sut su dik ai wa rai nga ai. Shi gaw mungkan bu hkawm lam (tour) magam bungli dap, shingjawng sumpan li (yatch) shachyaw dap, pyaw hpa hkali (luxary boat) galaw shapraw dap, ni hpe mung madu da ai wa rai nga ai.

8. Eike Batista Brazil
US$27 billion sut su ai, asak (53) ning re ai, College jawng pyi n-lu shangut la lu ai rai tim ‘mungkan hta sut su dik htum ai wa byin tai wa lu hkra’ ngu ai myit jasat hte shakut shaja sa wa ai sutdu ndai gaw, ya yang e mungkan hta numbat (8) ngu na sut su dik htum ai wa rai nga sai. Lai wa sai shaning na jahpan hta numbat (53) shara kaw rai nga ai kaw nna, dai ning na jahpan hta numbat (8) shara de du lung wa ai lam hpe yu yang, ram ram a lahta de lawan ai hku rawt jat wa nga ai lam hpe mung, mu chye lu nga ga ai.

9. Amancio Ortega Spain
US$25 billion sut su ai, asak (74) ning re ai Spain sutdu ndai gaw, ya yang e mungkan hta numbat (9) ngu na sut su dik ai wa rai nga ai.

10. Karl Albrecht Germany
US$23.5 billion sut su ai, asak (90) ning re ai, gat seng kaba (supermarket) madu, German sutdu ndai gaw, ya yang e mungkan hta numbat (10) ngu na sut su dik ai wa rai nga ai.--Forbes

Malaysia mungdan Kuala Lumpur mare kaw "Taxi" jawn na rai yang sadi ra na lam ni

1. TAXI kata de rai n-shang shi yang, shawng nnan mawdaw numbat (number plate) hpe galoi mung yu matsing da u.

2. TAXI shagu hta ka mara tawn da ra ai TAXI gawt ai wa a mying, mawdaw numbat, hkringdat (Driver’s ID) ni hpe galoi mung shawng yu matsing la da u.

3. Kaning re ai masa lam ni hta mi rai rai, TAXI gawt ai wa hku nna kaga hkrun lam hkawm masha (passenger) langai mi hpe bai nmai kahtap htaw la shangun ai. Lama wa TAXI gawt ai masha ni dai zawn galaw wa ai rai yang, hkrat ang ai hte hpe jaw kau nna yu mat na hku di u.

4. Mai byin ai rai yang, tinang shingtai hkrai TAXI jahkring jawn ai lam hpe koi yen u.

5. Bungli aten (office hours) a hpang hkan e rai yang, grau nna sadi maja let hkawm sa u.


TATUT MABYIN
04 January 2010 shana de 6:45 pm grup-yin hta num kasha langai mi ‘Wangsa Maju LRT Station’ kaw nna shi nga ai nta de wa na matu TAXI jahkring jawn ai.

Dai lam matu kaw sha naw du yang, wa lam bung na zawn re ai La langai mi hpe TAXI gawt ai wa bai kahtap nna htaw la ai. Masa lam ni hpe yu yang, ung ang na zawn re ai lam ni nre ai majaw, hkrit tsang hpa, ru tsang hpa, kaba langai mi shi kaw du hkrum hkra wa na re lam hpe n-tsen tawn ai lam mung tsep kawp nnga nga malu ai.

Shi nga ai lawk de magaw shang wa ra na lamgaw langai mi kaw magaw shang wa na matu TAXI gawt ai wa hpe tsun ai shaloi, dai TAXI gawt ai wa gaw lam shut masu su nna kaga maga mi de magaw shang mat wa nga yang, dai kahtap htaw la hkrum ai La wa gaw “shi a nga shara makau de nan du wa nga sai re majaw, shi hpe mahtang she shawng wa sa kau sanit” nga nna tsun ai. Ndai lam hpe TAXI gawt ai wa mung grai si mani ai hku nna dai num kasha kaw ahkang hpyi ai lam hpe dai num kasha mung ‘OK’ ngu dat ai. Dai num kasha shi nan mung mai kaja ai magam bungli langai mi hpe galaw dat sai hku nna sha sawn la nga ai.

Wut shakum tsaw kaba ni hte kum shinggrup da ai ‘TV3 Academy’ makau na masha nga lawk (housing area) ni htum ai shara de du ai hte rau dai ‘passenger’ La wa gaw mawdaw chyinghka ni yawng hpe ‘locked’ galaw kau nna shingdu de mung kalang ta hkrawt rai gayin wa nna dai num kasha a du kaw n-hkyi (knife) hte madi da ai. Dai num kasha hpe baw gum da shangun nna gumhpraw $200 hte hpawn shi a hkum hta kap ai Ja rai ni yawng hpe mung raw la kau ya ai. Dai hte hte sha myit n-dik shi ai majaw, kahtap nna jahkrit shama di n-htawm ‘May Bank (Jalan Setapak)’ de woi mat wa nna, ‘Bank Account’ hta rawng ai gumhpraw ni yawng hpe mung shaw la kau ya ai. Ndai mabyin byin ai aten gaw shana de 7:30 pm grup-yin hta rai nga ai.

Rawng marawng gumhpraw ni hpe shaw la kau ngut ai hpang, dai num kasha a ‘ATM Card’ hpe TAXI gawt ai wa bai n-htang jaw ai. Dai hpang ‘Tasik Titiwangsa’ a shingdu maga de mawdaw hpe gawt dumbri mat wa nna, “kaga TAXI hpe mahtang la jawn la nna nta wa na hku di u” nga tsun nna gumhpraw $10 jaw let dai num kasha hpe mung dai kaw jahkrat kau da ma ai.

Lai wa lai sa masha ni hpe bai karum hpyi na matu dai num kasha mung tsam mari tsam mara rai shakut hkawm pru wa yang she mawdaw lam kaba (main road) de bai du wa lu ai lam rai nga ai zawn, ndai mabyin a majaw dai num kasha mung grai kajawng htap lap, kahpra, nga ai lam mung rai nga ai. Dai hpang Pyada Dap (Police Station) de sa nna ‘report’ galaw ai shaloi she dai num kasha mung, shi gaw dai shani a matu No (3) ngu na ndai zawn re ai lam ni hpe hkrum katut lai wa ai masha rai nga ai lam hpe chye la lu ai lam rai nga ai.

Ndai zawn re ai mabyin ni gaw, dai ni na anhte langai hkrai hta mung, anhte a hpunau ni, manaw manang ni hta mung, n-myit mada da ai sha byin hkrum hkra wa chye ai lam rai nga ai. Dai re ai majaw, anhte hte ni nawn ai hpunau ni yawng hpang de mung ndai shiga hpe shachyam shabra sa wa ga ngu mayu nngai rai.

“Avatar” sumla hkrung yu ai majaw masha langai si

Sai lung ana lu ai Taiwan la langai mi gaw, ya yang e grai mying gumhkawng nga ai “Avatar” sumla hkrung sa yu ai a marang e, nau myit kahpra lai mat ai majaw, bawnu sai lam di ana (stroke) byin nna si mat ai lam, shi hpe gawn lajang ai sarawun hpe lakap nna chye lu ai.

Kuo mying ai la dai gaw, ndai shata praw daw hta Taiwan a dingdung maga na Hsinchu mare kaw dai “Avatar” sumla hkrung hpe yu nga ninglen e sha, nga n-pyaw wa ai lam a majaw tsi rung de woi sa mat wa ai. Nan Men General Hospital du ai shaloi Kuo gaw, sai lung ana (hypertension) a majaw, malap taw nga ai rai nna, jep sagawn yu ai shaloi shi a bawnu hta sai htaw ai lam (brain haemorrhage) byin nga ai lam hpe mu lu ai. ‘Ana a kumla hpe yu yang, byin mai ai lam gaw dai sumla hkrung hpe yu ai lam a majaw nau myit kahpra lai mat nna byin ai lam re’ nga nna ahkyak ahkya machyi masha gawn lajang gawk (emergency room) na lithkam sarawun Peng Chin-chih AFP hpe tsun ai.

Kuo gaw dai bawnu hta sai htaw ai lam a majaw, nhtoi (11) ya na ai hpang si mat ai. Ndai lam gaw, Director James Cameron woi hkrang shapraw ai “Avatar” mying ai hpungtang sumroi (science-fiction) sumla hkrung hpe yu ai lam hte lakap nna nambat langai ngu na si hkrung si htan lam re, nga nna The China Times shilaika hta tsun da nga ai.

Sumla hkrung hte seng ai ‘Blog’ ni law law hta mung, ndai “Avatar” zawn re ai 3D sumla hkrung ni hpe yu ai lam a majaw, baw machyi ana (headache), baw sin ana (dizziness), kraw galau ana (nausea) hte myi map map ai ana (blurry eyesight) ni byin hkrum hkra ai lam lajin laroi ga (complaint) ni law law hpe mung mu lu nga ga ai rai.--The Straits Times

Ladu shalai TV yu ai lam gaw masha hpe asak kadun shagun nga ai

Shadawn sharam nnga ai sha Television (TV) hpe ladu shalai yu ai lam gaw, shinggyim masha hpe asak kadun shangun chye nga ai lam hpe, Australia mungdan hta sawk sagawn lu nga ai. Aten masat tawn nna TV hpe shadawn sharam rai yu yu re ai masha ni hte shingdaw nna yu ga nga yang, shani shagu lani mi hta aten hkying hkum (4) hta jan ai hku TV yu nna aten jahtum ai masha ni hta, jau jau asak sumdoi chye ai baw lam ni amyu myu byin chye nga ai.

Ndai zawn, TV pat (screen) kaji hpe aten galu galang yu ai lam gaw, anhte shinggyim masha ni a salum (heart) a matu mung n-kaja ai lam rai nga ai, nga nna “The Journal of the American Heart Association” hta dip shabra ai sawk sagawn laika hta mu lu nga ai.

Gabaw amyu myu a majaw jau jau si hkrung si htan byin hkrum hkra chye ai lam ni gaw - TV hpe lani mi aten hkying hkum (2) n-hpring ai hku yu yu re ai masha ni hte shingdaw yu ga nga yang - TV hpe lani mi hkying hkum (4) a lahta de yu yu re ai masha ni hta, tsalam shadang (46) grau law nga ai lam hpe, sawk sagawn ninghkring David Dunstan hpe lakap nna chye lu ai. Salum sai lam gyip ana (cardiovascular disease) byin na matu tsalam shadang (80) jat ya nga ai lam hpe mung, dai ninghkring wa matut tsun lai wa sai rai.--AFP

Myen mung asuya magam gun ni hpe shata shabrai Ks.20,000 hpra jat ya na

Myen Asuya gaw 31 January 2010 kaw nna shi a mungshawa magam gun (civil servants) ni hpe shata shabrai (salary) Ks.20,000 hpra bai jat ya na hku re lam, lithkam salang langai hpe lakap nna chye lu ai. Ndai zawn, shata shabrai jat ya ai lam hpe hkam la lu na ni gaw, shata shabrai shata mi Ks.15,000 hpra lu ai ni kaw nna - shata shabrai shata mi Ks.80,000 hpra lu ai ni kaw du hkra rai na lam chye lu ai.

Ya yang e shata shabrai shata mi Ks.100,000 a lahta de lu nga ai ni a matu chyawm gaw, kaga alak mi jat na lam nnga ai lam hpe mung, na chye lu ai. Ndai hpe yu yang, shata shabrai jat ya ai lam gaw, gun rai manu ni laja lana rawt wa ai lam ni a majaw mayak mahkak lam ni law law hpe hkrum hkra nga nna a-put a-ngun nga nga ai, shata shabrai nem ai, asuya magam gun ni hpe myit shayu ya ai – myit shapyaw ya ai – lam rai nga ai hta sha n-ga, du wa na hkyen nga sai “2010 Ra Lata Poi” hpe mungshawa ni n-gun jaw, shang lawm madi shadaw, lawm na lam hpe myit mada yaw shada ai lam rai nga ai lam hpe mung, mu lu ai.

Ndai lam hte seng nna, tara shang n-dau shana ai lam ni nnga shi ai rai tim, mugun masha (employees) ni hku nna gaw chye da ngut chyalu rai nga sai lam hpe mung, na chye lu ga ai rai.--The Straits Times

2010 hta Myen mungdan kata Telephone shaga manu htam lahkawng rawt na

01 January 2010 kaw nna gaw Myen mung mungdan kata Telephone shaga manu ni htam lahkawng rawt sana re lam, seng ang ai hkring mang dap (ministry) shiga lawk kaw nna shiga pru wa ai. Ndai lam ni hpe tara shang n-dau shana ai lam rai nnga shi ai rai tim, mungdan kata na Telephone shaga manu ni hpe minute mi hta Myen gumhpraw Ks.50 du hkra sharawt jahpu dat na hku re lam, sumtsan shiga matut mahkai dap (telecommunications) lithkam salang langai mi AFP hpe tsun ai lam hta lakap nna chye lu ai.

2009 ning shaning htum hkra aten na Telephone shaga manu ni gaw, Landline kaw nna shaga ai rai yang minute mi hta Ks.15 hpra rai nna, Mobile kaw nna shaga ai rai yang gaw minute mi hta Ks.25 hpra hkrat ang ai lam rai nga ai. Ya na zawn, mungdan kata Telephone shaga manu ni hpe sharawt dat ai rai tim, “Overseas Calls” manu ni gaw shawoi na manu ni hte maren naw rai nga na re lam hpe mung, dai lithkam salang wa kahtap nna tsun lai wa sai rai.--The Straits Times

Myen Refugee 5,000 Malaysia mungdan kaw mawhpyi hpyi nga

Tsinyam hkrum masha (Refugee) masat lekmat ni hpe lang da ai masha marai 5,000 jan gaw ya aten hta Malaysia mungdan Butterworth mare kaw mawhpyi hpyi nga ma ai lam, Malaysia shiga lawk kaw nna chye lu ai. Dai ni hta na law malawng gaw Myen mungdan masha ni rai nga ma ai zawn, mung shawa a matsan dum lama ai lam ni hpe hkam la lu na matu, ma kaji ni hpe jai lang akyu jashawn/mawhpyi hpyi shangun nga ma ai lam hpe mung chye lu ai.

"Masha ndai ni hpe Malaysia mungdan asuya hku nna mung hpa nmai galaw ai. Rim ga nga yang mung anhte galaw lu ai lam gaw, rim nna ngwi pyaw gan ga lam bungli dap (Welfare Department) de shalai dat nna shanhte hpe karum madai shadaw di na lam sha nga ai. Malaysia mungdan asuya a tara ni hta, tsinyam hkrum masha ni magam bungli nmai galaw na hku dawdan masat da ai lam a majaw, ndai zawn maw hpyi hpyi sha ai lam ni byin wa ai lam re" nga nna Penang mungdaw hkam kaja lam, ngwi pyaw gan ga lam, shinggyim hpawng ginra hte makau grupyin yu lakawn lam komiti lithkam salang wa shi a ningmu hpe tsun dan ai.

Kanu masat n-htoi (10 May 2009) laksan

Myusha lam, mung masa lam hte sut masa lam ni a majaw buga hte Chyinghkai Nu hpe kau da nna mungkan a hkrum lam galu hta hkawm sa nga ra ai anhte kashu kasha ni yawng a malai, ngai Layang U Ra kaw nna Chyinghkai Nu ni yawng hpang de mahkawn kumhpa shagun dat nngai law.

Mahkawn Kumhpa shagun dat ai lam

Hka Panglai din ai sumtsan maigan ginra hkan e du hkawm nga sai Jinghpaw Wunpawng sai daw sai chyen hpu nau ni hpang de, Wunpawng Buga na ngai Layang U Ra "Mahkawn Kumhpa" shagun dat nngai.